Фразеалагізмы — гатовыя моўныя адзінкі, у большасці выпадкаў з пераносна-вобразным значэннем, вядомыя носьбітам мовы. Іх нельга ўзяць і перакласці, напрыклад, з рускай мовы на беларускую, а толькі падабраць адпаведнікі. Прапаноўваем пазнаёміцца з беларускімі фразеалагізмамі, значэнне якіх адпавядае рускім.
Бабушкины сказки — плёткі старой цёткі; забабоны старой жоны; грушы на вярбе; смаляны дуб.
Была не была — хай будзе, што будзе; што будзь, то і дзейся; Бог бацька; было не было.
Всякая всячина — збор каляда; усё усякае; усякае рознае.
В чём душа держится — кісялёвыя ногі; жыццё на нітку павесіў; хоць калочкам падапры.
Кот наплакал — з жабіны прыгаршчы; зайцу на закуску; у адну столку; можна на пальцы спячы; толькі вочы мачаць; як кату пад’есці; як вароне на хвасце паднесці; камарова жменя; з макавае зярнятка; вераб’ю раз дзеўбануць.
Ни кола ни двора — ні хаты ні лапаты; ні вала ні кала; ні плоту ні азяроду; ні курчаці ні парасяці; няма ні каліва; ні былінкі ні парасінкі.
От горшка два вершка — кату па пяту, вераб’ю па калена; пчале па крыле; раку па вусы; ад зямлі не адрос; кавалер — кату па каўнер.
Проще пареной репы — як абаранак з’есці; як хлеба з маслам з’есці; як сабаку муху схапіць; як лапаць сплесці.
Смех да и только — смеху варта; пацеха дый годзе; пацеха з меха.
Снять стружку — прачуханкі (прачуханца) даць; пытлю даць; навуку даць.
Умирать со смеху — з рогату канчацца; ад смеху заходзіцца (лопаць); са смеху кіснуць; бакі рваць; за жывот брацца; кішкі з рогату рваць; покатам класціся.
Хоть шаром покати — ні ўзяць ні ўцяць; як вымецена; няма за што рукі зачапіць.
Ходить по струнке — па дроце хадзіць; па адной дошчачцы скакаць.
Чепуху молоть — гарох з капустаю мяшаць; сем карабоў навезці; смалянога дуба плесці; кашалі з лапцямі плесці; рабой кабыле сон расказваць.
Даведайцеся пра нашы курсы падрыхтоўкі да ЦЭ і ЦТ. Дзякуй, што дачыталі да канца. Мы рады, што адказалі на вашы пытанні.
ЦТ анлайнYouTubeВКInstagramTelegramFacebook***
Калі хочаце апублікаваць гэты тэкст на сваім сайце або ў сацыяльнай сетцы, звяжыцеся з намі па адрасе info@adukar.by. Перадрук матэрыялаў магчымы толькі з пісьмовай згоды рэдакцыі.
